… per ina politica dil clima persistenta e la forza hidraulica

La megliera e la pli favoreivla viers igl ambient ei quella energia ch’ins drova buc. Jeu sustegn agids finanzials cun promover sistems per la sanaziun da baghetgs vegls e vastas contribuziuns per projects innovativs che reduceschan il consum d’energia e las svapurs CO2. Las finamiras dil clima – tenor la declaronza da Paris – ein dad observar. Las svapurs ston vegnir reducidas per la mesadad tochen 2030 visavi il stan da 1990. Quei sto era succeder en Svizra. Era eisi da promover stimuls per renunziar a sgols da cuorta distanza. Slargar e migliurar duein ins era la purschida dalla viafier, oravontut tier il traffic internaziunal da persunas e la notg per contonscher quei. La cumpart dil traffic public vid las svapurs CO2 digl entir traffic munta a 4 pertschien. In viadi cun la viafier caschuna 27 ga pli pauc CO2 ch’il medem viadi cun auto e basegna sis ga dameins energia. Il traffic public ha pia in effect considerabel cu ei va per procurar ch’il traffic general vegni pli persistents e favoreivels al clima. Perquei sto il traffic public vegnir rinforzaus a liunga vesta.

La forza hidraulica ei la tecnologia da clav, sche las svapurs da CO2 vegnan reducidas e per puder dumignar la sortida dall’energia atomara. Ella ei perquei da baghegiar ora vinavon. Las proceduras da concessiunar ein da simplificar ed accelerar massivamein. La dependenza digl exteriur ei da reducir. Per nies Cantun ei la forza hidraulica d’immensa muntada. Ils territoris da muntogna dueien nezegiar quella resursa e saver profitar finanzialmein aunc dapli da tala. Tscheins d’aua ein ina indemnisaziun per ina resursa dil territori muntagnard. Quei ei era en temps difficultus per la politica energetica pli che giustificau. Ina reducziun dil tscheins d’aua vegn jeu er a cumbatter egl avegnir.

Mias intervenziuns parlamentaras tier quei tema:

18.4198 – Interpellation; Ungerechte Gebühren des Eidgenössischen Starkstrominspektorats ESTI
https://www.parlament.ch/de/ratsbetrieb/suche-curia-vista/geschaeft?AffairId=20184198